جول العرب | خالد الغندور لـ لاعبي الزمالك: «الفترة الجاية محتاجة رجالة في الملعب»

قال الإعلامي خالد الغندور، إن «الفترة الجاية في نادي الزمالك تحتاج رجالة في الملعب، بسبب الظروف التي بيمر بيها النادي وفريق الكرة من تراجع للنتائج»، مؤكدًا: «لازم اللعيبة تخرج نفسها من الظروف دي لأنها بتلعب كورة ومعظمهم مأمنين مستقبلهم، أنت بتلعب كورة عشان أنت بتحب الكورة فبتكسب فلوس، لو أنت بتلعب كورة عشان الفلوس يبقى الوضع مختلف تمامًا».

لاعبي فريق الزمالك

خالد الغندور يوجه رسالة للاعبي الزمالك

وأضاف «الغندور» في تصريحات تليفزيونية عبر شاشة «قناة الزمالك»: «لاعيب الكورة لازم وهو بيلعب يبقى مستمتع بكرة القدم يبقى مبسوط وهو نازل يلعب مباراة، عاوز يقول للناس أنه لاعيب كبير، دي لازم تكون موجودة في الملعب الفترة الجاية، مع لاعبي الزمالك».

لاعبي فريق الزمالك

خالد الغندور: أنا زعلان من فيريرا ولاعبي الزمالك

وأكمل: «كرة القدم مش لعبة فردية، مقدرش أتألق لوحدي، لازم الفرقة كلها تتألق وتشتغل على قلب رجل واحد، وتكسب المباراة باللعب الجماعي وليس باللعب الفردي، وأحنا زعلانين من اللعيبة أوي، أول مرة أبقى زعلان من مستر فيريرا، لازم اللعيبة والجهاز الفني يصالحوا الجمهور الفترة الجاية، لأن الجمهور استحمل كتير جدًا في أخر شهرين».

وأتم:« أنت بتلعب في نادي الزمالك نادي كبير، لازم يبقى عندك ثقة في قدراتك، أنت مش بتلاعب ريال مدري ولا بتلاعب برشلونة ولا ليفربول ولا باريس سان جيرمان، أنت بتلاعب فرق من المفترض أنهم أقل منك، ومعظم لاعبيهم لا يلعبون في منتخبات بلادهم».